6 ліпеня 2011 года свята "Александрыя збірае сяброў" прайшло ў другі раз. Падчас свята адбыўся гала-канцэрт "Купалле над Дняпром". Менавіта Днепр стаў своеасаблівым сімвалам, які аб'ядноўвае многіх удзельнікаў з Магілёўскай, Гомельскай, Віцебскай, Кіеўскай і Смаленскай абласцей. Пачалося святкаванне з працы рамесных падворкаў усіх раёнаў Магілёўскай вобласці, Магілёва і Бабруйска. Публіка змагла пазнаёміцца і набыць вырабы народных умельцаў, паўдзельнічаць у гульнях, народных забавах і конкурсах, а таксама прыкупіць хатнюю жыўнасць.
     У гэты ж час на малую сцэну ў Александрыі выйшлі лепшыя самадзейныя калектывы аграгарадкоў Магілёўшчыны. Увечары пачаўся гала-канцэрт, у якім святочны настрой стваралі творчыя ансамблі рэгіёну - знакаміты народны аркестр імя Л. Іванова, "Медуніца", "Сувенір", "Вясёлка", "Рунь", "Юнацтва" і іншыя. Таксама выступілі госці з Расіі і Украіны.
     Не абышлося і без традыцыйных для "Купалля" карагодаў ля вогнішчаў, спуску на ваду вянкоў і свечак. Акрамя таго, можна было пракаціцца на конях і ўбачыць паказальныя скачкі парашутыстаў.
     У фармаце свята працаваў паходны кінатэатр, выязны гандаль. Завяршыў праграму феерверк і лазернае шоу. Усяго ў святкаванні Купалля ў Александрыі прынялі ўдзел каля 15 тысяч чалавек.