| |
Чарапы – вёска ў Фашчаўскім сельскім Савеце, за 31 км на паўднёвы ўсход ад Шклова, 42 км ад Магілёва. На захад пачынаецца р. Арціслаўка (прыток р. Дняпро). Транспартныя сувязі па мясцовай дарозе і далей па шашы Санкт-Пецярбург–Адэса. 49 гаспадарак, 62 жыхары (2007).
У пісьмовых крыніцах упершыню ўпамінаецца пад 1604 год як сяло (50 двароў) у Даманоўскім войтаўстве Магілёўскага староства-эканоміі Аршанскага павета Віцебскага ваяводства ВКЛ, дзяржаўная ўласнасць. У 1635 годзе 66 двароў. У першай палове 17 ст. да сяла было прыпісана 46 валок ворнай зямлі. Сяляне плацілі чынш. Пераважная частка зямлі знаходзілася ў мясцовай шляхты. У 1785 годзе ў складзе маёнтка Плешчыцы Магілёўскага павета Магілёўскага намесніцтва, 58 двароў, 358 жыхароў, уласнасць памешчыка. У канцы 18 ст. сяло ва ўладанні графа П. Завадоўскага, налічвала 40 двароў, 342 жыхары. У 1858 годзе ў Магілёўскім павеце, 32 двары, 171 жыхар. У 1897 годзе ў Нічыпаравіцкай воласці Горацкага павета Магілёўскай губерніі. Меўся хлебазапасны магазін. У 1909 годзе 46 двароў, 355 жыхароў. У 1911 годзе адкрыта школа, якая размясцілася ў наёмным памяшканні. З красавіка 1919 года ў Гомельскай губерніі РСФСР, з 1924 года ў Нічыпаравіцкім сельскім Савеце Лупалаўскага раёна Магілёўскай акругі, з 1931 года ў Шклоўскім раёне.
У 1934 годзе арганізаваны калгас «Перамога». З 1938 года ў Магілёўскай вобласці. У 1939 годзе калгас аб’ядноўваў 78 гаспадарак. У 1940 годзе 142 двары, 684 жыхары, дзейнічалі ветраны млын, сярэдняя школа.
У Вялікую Айчынную вайну з ліпеня 1941 года да чэрвеня 1944 года акупіравана нямецка-фашысцкімі захопнікамі. З 1952 года ў Фашчаўскім сельскім Савеце. У 1990 годзе 85 гаспадарак, 179 жыхароў, у складзе саўгаса – эксперыментальнай базы «Спартак» (цэнтр – в. Фашчаўка). Размяшчаліся вытворчая брыгада, ферма буйной рагатай жывёлы, дзейнічалі пачатковая школа, клуб, магазін.
У 1997 годзе 78 гаспадарак, 128 жыхароў. У 2007 годзе вёска ў складзе РУСП «Эксперыментальная база «Спартак». Планіровачна складаецца з 5 кароткіх прамалінейных вуліц мерыдыянальнай арыентацыі. Забудавана двухбакова, шчыльна, традыцыйнымі драўлянымі дамамі сядзібнага тыпу. На поўдзень гаспадарчы сектар. Радзіма народнага артыста Беларусі В. Раінчыка.
Чарапы : [вёска ў Шклоўскім раёне] // Гарады і вёскі Беларусі : Магілёўская вобласць : энцыклапедыя : у 8 т. / рэдкалегія : Т. У. Бялова [і інш.]. − Мінск, 2009. – Т. 7 : кн. 3. – С. 532–533. |
| |
|
ВЕРСИЯ САЙТА ДЛЯ СЛАБОВИДЯЩИХ
